Inkastoo geerida kedisada ah iyo mawtul-qafluhu sidiisa u naxdin badan yahay, waxa ka sii xanuun iyo murug badan ruux dhalinyaro ah, oo hadda uun dunida jaanta iyo jiibta la helay dhimashadiisa. Markaan halacsado ruux dhallinyaro ahoo aqoon annaan isku lahayn oo koonka ka sadcaalay dareen iyo damiir ahaanba waan u qasmaa, gubtaa, misna walbahaaraa. Marka saaxiib, rafiiq iyo qof aan isku milannay ay ku timaadana xaaladaydu waa ta aan hadda ku suganahay oo kale- waa marxalad argagax, qarracan ah iyo u qaadan waa ah.
Habeenkii koobaad ayuu u hoyanayaa gurigiisii rasmiga ahaa. Aniguna miiskii iyo labadii kuraas ee doodaha, iyo lafagurka hayaanka nololeed aanu isku weydaarsan jirnay, kuna caweyn jirnay ayaan habeenkii koobaad keli ku ahay. Kuraasta iyo miiska wareegsan laftarkoodu waa habeenkii saddexaad ee wadajirkayaga ay tabayaan. Xalay oo hoygiisa loo gelbiyay, iyo habeen hore oo hawlo na kala mashquuliyeen ayaanu soo moogganahay.
Waa duni maalinba qof qabriga loo gelbinaye, saaka ayaa Khaalid-Gaas la aasay, oo lala aasay riyooyinkii mugga weynaa ee uu qorsheytay, iyo himilooyinkii u haybinayay gaadhistooda. Ina Axmed Muxumed Cali Gaas wuxuu ahaa ehlu cibaado, salaad sax ah. Quraan akhriska saaxiib ayuu la ahaa, maalmaha Isniinta iyo Khamiista waa yareyd inta aanu ka soomin. Maalin ka hor geeridisa oo Isniintii ku astaysan wuu soomanaa, oo maaddaama hal Saxan iyo Hudheel aanu wax ka wada cuni jirnay, wuxuu maalinkaa igu war geliyay inuu soomanyahay, oo aan keligay iska qado tago. Habeenkiina aniga ayaa ku wargeliyay inuu iska casheeyo, oo caweska aanu iman, li ajliga inay ahayd habeenkii kubadda aan aadi jiray. Iinsaanka dunta wanaagsan ee rabbi igu hareereyay ayuu Khaalid ka mid ahaa. Dun wacnaanta, waalid addecnimada, naxarista, astaaaha dadnimada iyo sifo kastoo "NIN RAGEED" lahaa ayuu koobsaday. Xayndaabkayga iyo dadka igu hareeraysan, 10 shaqsi oo ka mid ah oo mar kastoo aan la shawro/haasawo ama la rafiiqo aan la tacajabo, oo tamadiyo garashadooda iyo sifooyinka ay koobsadeen ayuu ka mid ahaa. Ruux qalbiyadayadu is toydeen, misna si fudud iskula jaan qaadeen ayuu ahaa, se wadbaa ka dhigay tusbax kala furmay. Wadbaa na kala geeyay aniga, qoyskiisii u hanka weynaa, iyo gurigii uu curadka u ahaa iyo asxaabtiisii uu ku faani jiray, ee marwalba uu iiga warrami jiray.
Eebbe qabriga ha u nuuriyee, 10 dharaarood ayaa kasoo wareegtay ammintii uu ka qalinjebiyay heerka koobaad ee jaamacadda. Mikaygii iyo maalmihii u danbeeyay ee nolosha adduunyo uu ku lahaa waxaanu ka wada haasaaweynay caalamka waxbarshada, guurka, lacag sameynta, kala duwananshaha fursadaha dalka iyo dunida kale iyo helidda kaansho uu Kanada ka baadi goobayay. Musiibo aan ku odhan jiray waan ka cabsadaa in ay dhallinyaranimo igu timaado oo ahayd; "mawdki inuu i haleelo iyadoo aanan ka tegin taariikh, iyo wax timaadada la igu xasuusto ama ubad araggooda la iigu soo duceeyo oo magacayga sii sida" ayaa haleeshay.
"Dadka wanaagsan dunida kuma sii waaraan" waa odhaah caam ah oo markasta dhegaygu qaayibeen, ma qaadan jirin, ase beryihii u danbeysay aadbaan u aaminay. waayo dheh? Intii dad u wanaagsanaa, oo dunida ka sii socda ayaan arkayaa. Qof aad shan daqiiqo horteed is aragteen sidaas u rumeysato inuu mayd yahay waa adagtahay. Dhabtii, illaa hadda geeridiisu maskaxdayda ma gelin. Khaalid, Eebbe qabriga ha u waasiciyo, oo ha u naxaristo. Samir iyo iimaanna ha ka siiyo Aabbihii, Hooyadii, walaalihii, ehelkiisa iyo asxaabtiisii sida guud iyo sida gaar ahaaneed ay isu yaqaneenba.
Sagootis.
Comments
Post a Comment